Yeh kooche, yeh neelam ghar dilkashi ke,
Yeh lut-te hue kaarwaan zindagi ke,
Kahan hain kahan hain muhaafiz khudi ke;
Sanakhwaan-e-taqdees-e-mashriq kahan hain?

Yeh purpech galian, yeh be-khwaab bazaar,
Yeh gumnaam rahi, yeh sikkon ki jhankar,
Yeh ismat ke saudey, yeh saudon pe takrar;
Sanakhwaan-e-taqdees-e-mashriq kahan hain?

Ta-affun se pur, neem roshan yeh galian,
Yeh masli hui adh-khili zard kalian,
Yeh bikti hui khokhli rang-ralian;
Sanakhwaan-e-taqdees-e-mashriq kahan hain?

Woh ujle dareechon pe payal ki chhan chhan,
Tanaffus ki uljhan pe table ki dhan dhan,
Yeh be-rooh kamron mein khansi ki than than;
Snakhwaan-e-taqdees-e-mashriq kahan hain?