Ek dosheeza sarak par, dhoop mein hai be-qarar,
Choorian bajti hain kankar kootne mein bar, bar.

Choorian ke saaz mein yeh soz hai kaisa bhara,
Aankh mein "aansu" bani jaati hai jiski har sada.

Gard hai rukhsar par, zulfen ati hain khak mein,
Naazuki bal kha rahi hai deeda-e-ghumnak mein.

Ho raha hai jazb mehar-e-khoon-chukan ke roobaroo,
Kankaron ki nabz mein uthti jawani ka lahu.

Dhoop mein lahra rahi hai kaakul-e-amber sarisht,
Ho raha hai kamsini ka loch juzw-e-sang-o-khisht.

Pi rahi hain surkh kirnen mehar-e-aatish bar ki,
Nargisi aankhon ka ras, mai champai rukhsar ki.

Ghum ke badal khatir-e-naazuk pe hain chhaae hue,
Aaraze-e-rangeen hain ya do phool murjhaae hue.

Cheethron mein deedni hai roo-e-ghumgeen-e-shabab,
Abar ke aawara tukron mein ho jaise mahtaab.