Ji mein aata hai ke ab ahd-e-wafa bhi tor doon,
Un ko paa sakta hun main, yeh aasra bhi tor doon,
Haan munasib hai yeh zanjeer-e-hawa bhi tor doon,
Ai ghum-e-dil kya karoon, ai wahshat-e-dil kya karoon?

Ik mahal ki aar se nikla woh peela maahtaab,
Jaise mullah ka amaama, jaise baniey ki ki kitab;
Jaise muflis ki jawani, jaise bewa ka shabab;
Ai ghum-e-dil kya karoon, ai wahshat-e-dil kya karoon?

Dil mein ik shola bharak utha hai aakhir kya karoon,
mera paimana chhalak utha hai, aakhir kya karoon,
Zakhm seene ka mehak utha hai, aakhir kya karoon,
Ai ghum-e-dil kya karoon, ai wahshat-e-dil kya karoon?

Muflisi aur yeh mazaahir hain nazar ke saamne,
Sainkron Changez-o-Naadir hain nazar ke saamne,
Sainkron sultaan jaabar hain nazar ke saamne,
Ai ghum-e-dil kya karoon, ai wahshat-e-dil kya karoon?

Khwab-e-Sehar
Aadmi mannat kash-e-arbaab-e-irfaan hi raha,
Dard-e-insaani magar mehroom-e-darmaan hi raha.

Ik na ik dar par jabeen-e-shauq ghisti hi rahi,
Aadmeeat zulam ki chakki mein pisti hi rahi.

Rahbari jaari rahi, paighambari jaari rahi,
Deen ke parde mein jang-e-zargari jaari rahi.

Ahl-e-baatin ilm ke seenon ko garmaate rahe,
Juhal ke taarik saae haath phailaate rahe.

Yeh musalsal aafaten, yeh yorishen, yeh qatal-e-aam,
Aadmi kab tak rahe ohaam-e-baatil ka ghulaam!

Zehn-e-insaani ne ab ohaam ke zulmaat mein,
Zindagi ki sakht toofaani andheri raat mein,

Kuchh nahin tau kam se kam khwab-e-sehar dekha tau hai,
Jis taraf dekha na tha ab tak udhar dekha tau hai.