Hayaat-o-hurmat-o-mehar-o-wafa ki shaan hai aurat,
Shabaab-o-husn-o-andaaz-o-ada ki jaan hai aurat.

Hijaab-o-ismat-o-sharm-o-haya ki kaan hai aurat,
Jo dekho ghaur se har mard ka eemaan hai aurat.

Agar aurat na aati kul jahan maatam kada hota!
Agar aurat na hoti har makaan ik ghum kada hota!

Yad-e-qudrat mein ik chalti hui shamsheer hai aurat,
Zamin par fitrat-e-masoom ki tasvir hai aurat.

Jahan mein karti hai shahi, magar lashkar nahin rakhti,
Dilon ko karti hai zakhmi magar khanjar nahin rakhti.

Kahin maasoom tifli us ke naghmon se bahlti hai,
Kahin bekhud jawani us ke nosh-e-lab se phalti hai;

Kahin majboor peeri us ki baaton se sambhalti hai,
Kahin aaram se jaan us ke qadmon par nikalti hai.

Woh roti hai saari kaaenaat aansu bahati hai,
Woh hansti hai tau fitrat bekhudi se muskarati hai.

Ai Ishaq Hamen Barbad Na Kar 
Ai ishq na chher aa aa ke hamen, hum bhoole huon ko yaad na kar,
Pehle hi bahut naashaad hain hum, tu aur hamen naashaad na kar.
Qismat ka sitam hi kam nahin kuchh, yeh taaza sitam eejaad na kar.
Yoon zulam na kar, bedaad na kar,
Ai ishq hamen barbaad na kar.

Jis din se mile hain donon ka sab chain gaya aaraam gaya,
Chehron se badhar-e-subah gai, aankhon se farogh-e-sham gaya,
Haathon se khushi ka jaam chhuta, honton se hansi ka naam gaya;
Ghumgeen na bana, naashaad na kar,
Ai ishq hamen barbaad na kar.

Raaton ko uth uth rote hain, ro ro kar duaaen karte hain,
Aankhon mein tasawur, dil mein khalish, sar dhunte hain aahen bharte hain,
Ai ishq, yeh kaisa rog laga, jeete hain na zaalim marte hain.
Yeh zulam tau ai jallaad na kar,
Ai ishq hamen barbaad na kar.